【每個人都有不同程度的覺悟】
反送中運動已經踏入第三個月，
相信大家同藍絲親朋戚友嘅割蓆已經工多藝熟
而前排IG開咗心事台同大家吹水後，
我發現有好多讀者同自己相同政見嘅情侶朋友，
竟然都因為呢場運動而出現問題。
有啲情侶或者朋友會約埋一齊出去，
好多時去到一個位有人會想散水，有人會想留低
有人想行得更前，有人就會想企後啲
於是因為呢種差異，令到想留想上前嘅人覺得被拖後腿
而想走想行後嘅人又因好擔心安全而更加恐懼。
呢種進退兩難嘅矛盾，令到好多關係中間多種份壓力同負能量
每個人都有唔同程度嘅覺悟
同樣，每個人都有唔同嘅包袱同考量。
有人願意為呢個社會企到最前，
更加有人會願意用肉身擋狗畀手足離開（好感動呀嗚）
同一時間，有人非常恐懼都願意出門參與
有人心理同生理未準備好要被拘捕被狗打⋯
自我犧牲當然高尚，但恐懼其實係人之常情
但如果你不停將呢個咁高嘅道德標準套落他人身上
你只會一次又一次失望。
兄弟爬山，唔係講完就算
一對情侶，一班朋友之間都一樣要兄弟爬山
你想上前，我絕不用「我會好擔心」阻礙你，
你想離開，我都絕不用「爭取民主自由」威逼你。
//
我自己身邊嘅朋友都慢慢開始失去熱情，
由六月時個個都熱血沸騰、鬥志高昂
到依家九月每次好似愈嚟愈少人一齊出去⋯
上星期喺千百萬負面情緒夾攻之下
有其中一種情緒係我對呢種大家鬥志冷卻有啲失望⋯
我都學習緊唔好將自己一套強加喺身邊人身上，
畢竟我哋每個人最需要嘅，只係對自己良心負責
做自己唔會後悔嘅決定，與人無尤。
《Toy Story 4》入面有一幕：
胡迪同巴斯講：「如果我放棄，我對唔住自己心入面把聲」
巴斯問：「邊個係心入面把聲」
胡迪話：「係我嘅良心。」
問心無愧就好，毋需綁架他人良心。
//
有讀者同我講身邊無朋友可以傾得埋，
被港豬包圍令佢生活得好痛苦⋯
想話畀大家知，民主路上，你從不孤單。
不過除咗政治，大家都唔好忘記要好好生活
學識放低政治休息一下，我哋先可以繼續作戰。
IG：@hkgirlfriend
FB：港女友
Search